नेपाल राष्ट्र बैंक अन्तर्गतको वित्तीय सूचना इकाई (FIU-Nepal) ले २०२४ मा शंकास्पद कारोबारमा ४९ प्रतिशतको उल्लेखनीय वृद्धि भएको प्रतिवेदन सार्वजनिक गरेको छ। FIU-Nepal को चौथो वार्षिक न्यूजलेटर अनुसार, २०२३ मा प्राप्त ६,२५५ शंकास्पद कारोबार प्रतिवेदनहरू (STRs) २०२४ मा बढेर ९,३०४ पुगेका छन्, जुन मनी लन्डरिङ निवारण ऐन, २०६४ लागू भएयता सबैभन्दा उच्च संख्या हो ।
२०२४ मा FIU ले ९,३०४ वटा शंकास्पद कारोबार प्रतिवेदनहरू (STRs) प्राप्त गरेको छ, जुन मनी लन्डरिङ निवारण ऐन लागू भएयता सबैभन्दा धेरै हो। तीमध्ये १,८९४ प्रतिवेदन विश्लेषण गरी १,०८६ प्रतिवेदन कानुनी निकायहरूमा पठाइएको छ भने बाँकी ८०८ पुनः विश्लेषणका लागि राखिएको छ। त्यस्तै, २०२४ मा १.९७ मिलियन थ्रेसहोल्ड कारोबार प्रतिवेदन (TTRs) पनि प्राप्त भएका छन्। सबैभन्दा धेरै शंकास्पद रिपोर्ट वाणिज्य बैंकहरूबाट प्राप्त भएका छन् भने बीमा, वित्त कम्पनी, स्टक ब्रोकर र पेमेंट सेवा प्रदायकहरूबाट पनि रिपोर्टहरू प्राप्त भएका छन्।
FIU-Nepal ले आफ्नो प्रविधिगत पूर्वाधार विस्तार गर्दै goAML प्रणालीमा १,९०५ भन्दा बढी संस्थाहरूलाई समावेश गरेको छ, जसमा DNFBPs (जस्तै क्यासिनो, बहुमूल्य धातु तथा रत्नका व्यापारी, रियल इस्टेट एजेन्ट) पनि छन्। यो प्रणाली मार्फत वित्तीय गुप्त सूचना संकलन र विश्लेषणमा सुधार आएको बताइएको छ। नेपाल २०२५ फेब्रुअरीमा FATF को ‘ग्रे लिस्ट’ मा परेको छ, जसका कारण FIU-Nepal ले कानुनी सुधार, नयाँ नियमावली, रणनीति तथा कार्ययोजना निर्माण गरेर FATF सँग समन्वय गरिरहेको छ। रिपोर्टले FIU को सक्रिय भूमिका र सुधारात्मक प्रयासहरूलाई उजागर गर्दै नेपाललाई ‘ग्रे लिस्ट’ बाट हटाउने उद्देश्यप्रति प्रतिबद्धता देखाएको छ ।