हिमालयन बैंक लिमिटेड (HBL) ले आजदेखि सर्वसाधारणका लागि ९२,५०,४६९ कित्ता एफपीओ शेयर बिक्री खुला गरेको छ। यो एफपीओ प्रति कित्ता १५७ रुपैयाँ (अर्थात् ५७ रुपैयाँ प्रिमियमसहित) मा जारी गरिएको हो। बिक्रीको प्रारम्भिक म्याद साउन ४ गते सम्म तोकिएको छ भने, पर्याप्त आवेदन नपरेमा साउन १४ गतेसम्म म्याद विस्तार हुने छ। बैंकले यस एफपीओमार्फत करीब १ अर्ब ४५ करोड रुपैयाँ संकलन गर्ने लक्ष्य लिएको छ।
यो निष्कासनको व्यवस्थापनको जिम्मेवारी सिटिजन्स क्यापिटल लिमिटेड ले पाएको छ। लगानीकर्ताले कम्तीमा १० कित्तादेखि अधिकतम ९२,५०,४६९ कित्तासम्म आवेदन दिन सक्नेछन्। यो एफपीओ शेयर निष्कासनपछि बैंकको पूँजी आधार बलियो हुने अपेक्षा गरिएको छ, जुन दीर्घकालीन स्थायित्वका दृष्टिकोणले सकारात्मक मानिन्छ।
यसबीच, CARE Ratings Nepal Limited ले हिमालयन बैंकको इस्युअर रेटिङ घटाएर ‘CARE-NP BBB+ (Is)’ बाट ‘CARE-NP BBB (Is)’ मा ल्याएको छ। उक्त रेटिङ हाल क्रेडिट वाचमा नकारात्मक संकेतसहित राखिएको छ। यस downgrade ले बैंकको Subordinated Bond को रेटिङमा पनि प्रभाव पारेको छ। यस्तो रेटिङले बैंकको समयमै वित्तीय दायित्व पुरा गर्ने क्षमतामा मध्यम स्तरको जोखिम रहेको देखाउँछ।
यद्यपि, हिमालयन बैंक देशकै अग्रणी वाणिज्य बैंकमध्ये एक हो र यसको ब्रान्ड तथा वित्तीय इतिहास सशक्त मानिन्छ। एफपीओमा सहभागिता जनाउने लगानीकर्ताहरूले रेटिङ र हालको बजार धारणा समेतलाई विचार गरेर निर्णय लिनु उपयुक्त हुनेछ। इच्छुक लगानीकर्ताहरूले मेरो शेयर प्रणालीमार्फत वा सी–आस्वा सदस्य संस्थामार्फत आवेदन दिन सक्नेछन ।